Tuesday, November 12, 2019

விவிலியத்தேடல்: தீய ஆவி பிடித்தவர் குணமடைதல் – பகுதி 3

Teen climate activist Greta Thunberg

பூமியில் புதுமை – சுற்றுச்சூழல் விருதைப் பெற மறுத்த Greta

ஐரோப்பியக் கண்டத்தைச் சேர்ந்த, டென்மார்க், பின்லாந்து, ஐஸ்லாந்து, நார்வே மற்றும் சுவீடன் ஆகிய நாடுகள் இணைந்து உருவாக்கியிருக்கும் ஒரு கூட்டமைப்பு, நோர்டிக் கவுன்சில் (Nordic Council) என்ற அவை. இந்த அவையினர், இலக்கியம், திரைப்படம், இசை, சுற்றுச்சூழல் போன்ற துறைகளில் சிறந்து விளங்குவோருக்கு, ஒவ்வோர் ஆண்டும் விருதுகள் வழங்கி வருகின்றனர். சுற்றுச்சூழலையும், பூமிக்கோளத்தையும் பாதுகாக்க, இளையத் தலைமுறையினருக்குத் தூண்டுதலாக இருந்து போராடும் 16 வயது நிறைந்த இளம்பெண் கிரியெத்தா துன்பெரெய் (Greta Thunberg) அவர்களை, சுற்றுச்சூழல் துறை விருதுக்கென தேர்ந்தெடுத்திருப்பதாக, நோர்டிக் கவுன்சில், அக்டோபர் மாத இறுதியில் அறிவித்திருந்தது.
இந்த விருதைப் பெற மறுப்பு தெரிவித்து, கிரியெத்தா அவர்கள் அறிக்கையொன்றை வெளியிட்டார். அதில், சுற்றுச்சூழல் விருதுக்கென என்னைத் தேர்ந்தெடுத்துள்ளதில் மகிழ்ச்சி. ஆனால், சுற்றுச்சூழலைப் பாதுகாக்கப் போராடுபவர்களுக்கு விருது வழங்குவதற்குப் பதில், சுற்றுச்சூழலின் சீரழிவைக் குறித்து அறிவியலாளர்கள் கூறும் உண்மைகளுக்கும், அதைப் பாதுகாக்க அவர்கள் முன்வைக்கும் ஆலோசனைகளுக்கும், அரசியல் தலைவர்களும், மக்களும், செவிமடுத்து, செயல்படுவதுதான், இன்றைய அவசரத் தேவை எனத் தெரிவித்துள்ளார். மேலும், நோர்டிக் கவுன்சில் அமைப்பைச் சேர்ந்த நாடுகள், பெட்ரோலிய எண்ணெய்க் கிணறுகளை, அதிக அளவு தோண்டுவதற்குத் திட்டமிட்டுள்ளன என்பதையும், இத்தகையத் திட்டத்தால், பூமியின் வெப்பம் தற்போது உள்ளதைவிட பெருமளவு அதிகரிக்கும் என்பதையும் கவலையுடன் குறிப்பிட்டுள்ளார், இளம்பெண், கிரியெத்தா துன்பெரெய். (நன்றி: இந்து தமிழ் திசை)

Jesus and the Possessed Man after healing

தீய ஆவி பிடித்தவர் குணமடைதல் பகுதி 3

வழிபாட்டுத் தலங்களில் உயிர்பலிகள் நிகழ்வதை, செய்திகளாகக் கேட்டு வருகிறோம். இவ்வாண்டு, மார்ச் 15ம் தேதி, வெள்ளியன்று, நியூசிலாந்து நாட்டின் Christchurch என்ற நகரில், இஸ்லாமியத் தொழுகைக்கூடத்தில் நிகழ்ந்த துப்பாக்கிச்சூட்டில், 51 பேர் கொல்லப்பட்டனர். ஏப்ரல் 21, உயிர்ப்பு ஞாயிறன்று, இலங்கையில், மூன்று கிறிஸ்தவ ஆலயங்களில் நிகழ்த்தப்பட்ட தற்கொலை குண்டுவெடிப்புகளால், 259 அப்பாவி மக்கள் பலியாயினர். இதில் கூடுதல் வேதனையைத் தரும் மற்றொரு செய்தியும் இடம்பெற்றது. நியூசிலாந்து தொழுகைக்கூடத்தில் துப்பாக்கிச் சூட்டினை மேற்கொண்ட அந்த மனிதர், அந்நிகழ்வை, சமூக வலைத்தளங்களில் நேரடி ஒளிபரப்பு செய்திருந்தார்.
கொலை வெறியால் ஆட்கொள்ளப்பட்ட அந்த மனிதர் செய்ததைப் போலவே, மற்றொரு மனிதர், அக்டோபர் 9ம் தேதி ஜெர்மனியில், Halle என்ற நகரில், யூதர்களின் தொழுகைக்கூடத்தில் தாக்குதல்களை மேற்கொள்ளவும், அதனை நேரடி ஒளிபரப்பு செய்யவும் தேவையான ஏற்பாடுகளுடன் சென்றார். ஆனால், தொழுகையில் இருந்தோர், அத்தொழுகைக்கூடத்தின் கதவை மூடிவிட்டதால், அம்மனிதரின் கொலைவெறித் திட்டம் நிறைவேறவில்லை. அந்த ஆத்திரத்தில், அவர், தொழுகைக்கூடத்தின் அருகே சென்றுகொண்டிருந்த ஒரு பெண்ணையும், அருகிலிருந்த ஓர் உணவகத்தில் இருந்த மனிதரையும் கொன்றார் என்று செய்திகள் கூறுகின்றன.

இறைவனை வழிபடுதல், மறைசார்ந்த உரைகளுக்குச் செவிமடுத்தல் போன்ற உன்னத எண்ணங்களே, ஆலயங்களுக்குச் செல்வோரிடையே நிலவும். இத்தகைய உன்னத எண்ணங்கள் நடுவே, மக்களைக் கொல்லும் எண்ணத்துடன் ஒருவர் ஆலயம் செல்வது, நம்மை அதிர்ச்சியடையச் செய்கிறது. மதவெறி, கொலைவெறி போன்ற தீய ஆவிகளால் ஆட்கொள்ளப்பட்டவர்களும் ஆலயங்களுக்குள் நுழையமுடியும் என்பதற்கு, வேதனை தரும் எடுத்துக்காட்டுகள், இவர்கள்.

கப்பர்நாகும் தொழுகைக்கூடத்தில், தீய ஆவிகளால் ஆட்கொள்ளப்பட்ட ஒருவரை, இயேசு குணமாக்கியப் புதுமையைச் சிந்தித்து வருகிறோம். ஓய்வுநாளில், தொழுகைக்கூடத்தில் இஸ்ரயேல் மக்கள் கூடிவருவது, ஒவ்வொரு ஊரிலும் நிகழ்ந்தது. அவ்வேளையில், தீய ஆவி பிடித்த ஒருவர், அவர்களுடன் தொழுகைக்கூடத்தில் நுழைவது எளிதல்ல. தீய ஆவியினால் வதைக்கப்பட்டவர் என்பது வெளிப்படையாகத் தெரிந்தால், ஊரார் அவரை உள்ளே அனுமதித்திருக்க மாட்டார்கள். அப்படியிருக்க, 'தீய ஆவி பிடித்த ஒருவர் தொழுகைக்கூடத்தில் இருந்தார்' (மாற்கு 1:23; லூக்கா 4:33) என்று நற்செய்தியாளர்கள் மாற்கும், லூக்காவும் கூறியிருப்பதற்கு, விவிலிய விரிவுரையாளர்கள் ஒரு சில விளக்கங்களை அளித்துள்ளனர்.

தீய ஆவி பிடித்திருந்தவர், வெளிப்புறத்தில், மற்றவர்களைப்போலவே காணப்பட்டதால், அவரும், மக்களோடு, மக்களாக, தொழுகைக்கூடத்தில் அமர்ந்திருந்தார் என்பது, ஒரு சிலர் தரும் விளக்கம். வேறு சில விரிவுரையாளர்களோ, இன்னும் ஒரு படி மேலேச் சென்று, அம்மனிதர், கப்பர்நாகும் தொழுகைக்கூடத்திற்கு வழக்கமாகச் செல்பவர் என்று கூறியுள்ளனர். அவருக்குள் குடியிருந்த தீய ஆவி, அதுவரை, அத்தொழுகைக் கூடத்தில் கற்பிக்கப்பட்ட பாடங்களால் எவ்வகையிலும் பாதிக்கப்படாமல் இருந்தது என்றும் ஒரு சிலர் விளக்கம் அளித்துள்ளனர்.
இந்த விளக்கத்தைக் கேட்கும்போது, நமது ஆலயங்களில் நிகழும் வழிபாடுகளை ஆய்வு செய்யத் தோன்றுகிறது. சமுதாயத்தில் நிகழும் அவலங்களைப்பற்றி பேசுவதற்குத் தயங்கி, பூசி மெழுகி, அனைவரையும் மகிழ்வித்து, அனுப்பிவைக்கும் வழிபாடுகளையும், அவற்றை வழிநடத்துவோர், யாரையும் எவ்வகையிலும் பாதிக்காத இனிப்பான செய்திகளை மறையுரைகளாக வழங்குவதையும் எண்ணிப்பார்க்கலாம்.
அத்தகைய வழிபாடுகளை, கப்பர்நாகும் தொழுகைக்கூடத்தில், மறைநூல் அறிஞர்கள் நடத்திவந்ததால், அங்கு சென்ற தீய ஆவிகள், அந்த வழிபாடுகளில் சுகமாகப் பங்கேற்றன. அன்றோ, அத்தொழுகைக்கூடத்தில் ஒலித்த இயேசுவின் போதனைகள், 'மறைநூல் அறிஞரைப் போலன்றி, அதிகாரத்தோடு' (மாற்கு 1:22) வெளிவந்ததால், அவை, அங்கிருந்த தீய ஆவி, அல்லது ஆவிகளை வதைக்க ஆரம்பித்தன. அம்மனிதருக்குள், அதுவரை, சுகமாக உறங்கிக்கிடந்த தீய ஆவிகள் இயேசுவை எதிர்க்கத் துணிந்தன.
தீய ஆவிகளை வதைக்கும் வண்ணம் இயேசு என்ன கூறினார்? அவர், தனிப்பட்ட அதிகாரத்துடன் போதித்தார் என்று மட்டும் கூறும் மாற்கும் லூக்காவும், அவர் என்ன போதித்தார் என்ற விவரத்தை, இந்நிகழ்வில் கூறவில்லை. ஆனால், இயேசு கப்பர்நாகுமுக்கு வருவதற்குமுன், நாசரேத்து தொழுகைக்கூடத்தில் கூறியவற்றை நாம் அறிவோம். நற்செய்தியாளர் லூக்கா இப்பகுதியை இவ்வாறு பதிவு செய்துள்ளார்:
லூக்கா 4:16-19
இயேசு தாம் வளர்ந்த ஊராகிய நாசரேத்துக்கு வந்தார். தமது வழக்கத்தின்படி ஓய்வுநாளில் தொழுகைக் கூடத்திற்குச் சென்று வாசிக்க எழுந்தார். இறைவாக்கினர் எசாயாவின் சுருளேடு அவரிடம் கொடுக்கப்பட்டது. அவர் அதைப் பிரித்தபோது கண்ட பகுதியில் இவ்வாறு எழுதியிருந்தது;
"ஆண்டவருடைய ஆவி என்மேல் உளது; ஏனெனில், அவர் எனக்கு அருள்பொழிவு செய்துள்ளார். ஏழைகளுக்கு நற்செய்தியை அறிவிக்கவும் சிறைப்பட்டோர் விடுதலை அடைவர். பார்வையற்றோர் பார்வைபெறுவர் என முழக்கமிடவும் ஒடுக்கப்பட்டோரை விடுதலை செய்து அனுப்பவும் ஆண்டவர் அருள்தரும் ஆண்டினை முழக்கமிட்டு அறிவிக்கவும் அவர் என்னை அனுப்பியுள்ளார்."
எசாயாவின் சுருளேட்டில் பல பகுதிகள் இருந்தாலும், இயேசு அதைப் பிரித்தபோது, அவர் கண்களில் விழுந்தது, இறைவாக்கினர் வழங்கிய விடுதலைச் செய்தி. மக்களை பல வழிகளில் கட்டிப்போட்டிருக்கும் தளைகளை அகற்றுவதே தன் பணி என்று இறைவாக்கினர் எசாயா சொன்னதை, இயேசு தன் பணிவாழ்வின் முதல் செய்தியாக அறிவித்தார். அதுமட்டுமல்ல, "நீங்கள் கேட்ட இந்த மறைநூல் வாக்கு இன்று நிறைவேறிற்று" (லூக்கா 4:21) என்பதையும், அழுத்தந்திருத்தமாகக் கூறியிருந்தார்.

நாசரேத்து தொழுகைக்கூடத்தில், இயேசு அறிவித்த விடுதலைப் பணியை, கப்பர்நாகும் தொழுகைக்கூடத்திலும் அவர் அதிகாரத் தொனியுடன் அறிவித்திருக்க வேண்டும். எனவே, தாங்கள் ஆக்ரமித்திருந்த மனிதர் மீது கொண்டிருந்த அதிகாரம் பறிபோய்விடும் என்பதை உணர்ந்த தீய ஆவிகள், இயேசுவை அங்கிருந்து விரட்டத் துணிந்தன. இயேசுவை அங்கிருந்து துரத்துவதற்கு, தீய ஆவிகள் பயன்படுத்திய சொற்கள், நம்மைச் சிந்திக்கத் தூண்டுகின்றன:
அவரைப் பிடித்திருந்த ஆவி, "நாசரேத்து இயேசுவே, உமக்கு இங்கு என்ன வேலை? எங்களை ஒழித்துவிடவா வந்தீர்? நீர் யார் என எனக்குத் தெரியும். நீர் கடவுளுக்கு அர்ப்பணமானவர்" என்று கத்தியது. (மாற்கு 1:24)

இயேசுவின் மீது தங்கள் அதிகாரத்தை நிலைநாட்ட, தீய ஆவிகள் இரு யுக்திகளைப் பயன்படுத்தின. முதல் யுக்தி, இயேசுவை, பெயர் சொல்லி அழைத்தது. இரண்டாவது யுக்தி, இயேசு யார் என்று தங்களுக்குத் தெரியும் என்று அறிவித்தது. 

இஸ்ரயேல் மக்கள் மத்தியில் பெயர்களுக்குத் தனி மதிப்பு இருந்தது. ஒருவருக்கு மற்றொருவர் பெயர் சூட்டினால், அந்தப் பெயரைத் தாங்கியவர்மீது பெயர் சூட்டியவருக்கு அதிகாரம் உண்டு என்ற நம்பிக்கை அவர்கள் மத்தியில் இருந்தது. எனவேதான், இறைவனைப் பெயர் சொல்லி அழைக்க அவர்கள் தயங்கினார்கள். இறைவனுக்கு மக்கள் பெயர் சூட்டினால், அவர் தங்கள் சக்திக்கு உட்பட்டவராகிவிடுவார் என்ற தயக்கம் அது.
அதேவேளையில், இறைவன் அவர்களுக்குப் பெயர் சூட்டியதைப் பெருமையாக அவர்கள் எண்ணிவந்தனர். விவிலியத்தில் கூறப்பட்டுள்ள அனைத்து முக்கியமான பெயர்களும் இறைவன் தந்த பெயர்கள்தாம். ஆபிரகாமில் துவங்கி, ஈசாக்கு, யாக்கோபு, யோசேப்பு, மோசே என்று தொடர்ந்து, யோவான், இயேசு என்று, அனைத்து பெயர்களும் இறைவன் தந்த பெயர்கள். ஒவ்வொரு பெயருக்கும் ஓர் அர்த்தமும் உண்டு.

யோசேப்பின் கனவில் தோன்றிய வானதூதர், "மரியா... ஒரு மகனைப் பெற்றெடுப்பார். அவருக்கு இயேசு எனப் பெயரிடுவீர். ஏனெனில், அவர் தம் மக்களை அவர்களுடைய பாவங்களிலிருந்து மீட்பார்" என்றார். (மத்தேயு 1:21)
மக்களை மீட்பவர் என்ற பொருள் தாங்கிய 'இயேசு' என்ற பெயர் வழங்கப்பட்டவரை, தான் பெயர் சொல்லி அழைத்ததால், அவர் தன் கட்டுப்பாட்டில் உள்ளார் என்று தீய ஆவி தவறானக் கனவு கண்டது.
"நீர் யார் என எனக்குத் தெரியும். நீர் கடவுளுக்கு அர்ப்பணமானவர்" என்று (மாற்கு 1:24, லூக்கா 4:34) தீய ஆவி அறிக்கையிடுவது, மேலும் சில எண்ணங்களை எழுப்புகின்றன. இயேசு வாழ்ந்த காலத்தில் அவர் யார் என்பதைப் புரிந்துகொள்ள இயலாமல், அவரது குடும்பத்தினரும், சீடர்களும் தவித்தனர் என்பதை நான்கு நற்செய்திகளும் பலமுறை குறிப்பிடுகின்றன. ஆனால், தீய ஆவிகளோ அவரை தங்களுக்குத் தெரியும் என்பதை ஊரறிய கத்தின. இது ஒரு விசுவாச அறிக்கை அல்ல, மாறாக, இயேசுவை அடங்கிப்போகச் செய்வதற்கு தீய ஆவிகள் எழுப்பிய ஓலம்.

தன்னை அடக்கி ஆள்வதற்காக, தீய ஆவி பயன்படுத்திய யுக்திகளையெல்லாம் இயேசு முறியடித்து, அந்த ஆவியை வெளியேற்றுகிறார். தீய ஆவி பிடித்தவரை இயேசு குணமாக்கியதும், அங்குள்ளவர்கள், வியந்து கூறும் சொற்கள் இதோ:
"இது என்ன? இது அதிகாரம் கொண்ட புதிய போதனையாய் இருக்கிறதே! இவர் தீய ஆவிகளுக்கும் கட்டளையிடுகிறார்; அவையும் இவருக்குக் கீழ்ப்படிகின்றனவே!" (மாற்கு 1:27) என்று மாற்கு நற்செய்தியிலும், "எப்படிப் பேசுகிறார், பாருங்கள்! அதிகாரத்தோடும் வல்லமையோடும் தீய ஆவிகளுக்குக் கட்டளையிடுகிறார்; அவையும் போய்விடுகின்றனவே!" (லூக்கா 4:36) என்று லூக்கா நற்செய்தியிலும் வாசிக்கிறோம்.

இயேசு கூறிய சொற்களில் மட்டும் தனித்துவம் மிகுந்த அதிகாரமும் வல்லமையும் வெளிப்படவில்லை, மாறாக, அவர் ஆற்றிய செயல்களிலும் அந்த சக்தி வெளிப்பட்டது. அரியணையில் அமர்ந்து, தங்கள் சொற்களால், மக்களை ஆட்டிப்படைக்கும் அதிகாரத்தைக் காட்டிலும், மக்களுக்கு நன்மைகள் செய்து, அதன் வழியே மக்கள் மனங்களில் அரியணை கொள்ளும் அதிகாரமே உயர்ந்தது என்பதை, இயேசு இப்புதுமை வழியே நம் எண்ணங்களில் ஆழப் பதிக்கிறார். பிறருக்கு நன்மைகள் செய்வதிலும், பணியாற்றுவதிலும் நம் முழுமையான சக்தியையும், அதிகாரத்தையும் பயன்படுத்துவதற்குத் தேவையானத் தெளிவை இறைவன் நம் அனைவருக்கும் வழங்கவேண்டும் என்று செபிப்போம்.


Saturday, November 9, 2019

On the other side of death… மரணத்தின் மறுபக்கம்...

God of the Living

Greg Anderson

32nd Sunday in Ordinary Time

As the doctor was preparing to leave the room, the sick man, fighting for his life, turned to him and said, "Doctor, I am afraid to die. Tell me what lies on the other side."
Very quietly, the doctor said, "I don't know."
"You don't know? You, a Christian man, do not know what is on the other side?" asked the patient.
The doctor was holding the handle of the door. From the other side of the door came a sound of scratching and whining, and as the doctor opened the door, a dog sprang into the room and leaped on him with an eager show of gladness.
Turning to the patient, the doctor said, "Did you notice my dog? He's never been in this room before. He didn't know what was inside. He knew nothing except that his master was here, and when the door opened, he sprang in without fear. I know little of what is on the other side of death, but I do know one thing... I know my Master is there and that is enough." (Author Unknown)

This is one of my favourite stories to help me understand what is on the other side of death. The month of November gives us an opportunity to think of death, after-life and the dear departed. Throughout this month, we pay occasional / frequent visits to the graveyard, and offer Masses for the dear departed. This is also the time when the Liturgical year is coming to a close.
Hence, the First Reading and Gospel assigned for today’s liturgy give us an opportunity to think of life, death, and afterlife. The first reading, taken from II Maccabees, paints a glorious picture of a mother and her seven sons who brave torture and death for a noble cause. They look at death only as a passage. We hear two of the sons making faith-filled statements about resurrection:
And when he was at his last breath, he said, “You … dismiss us from this present life, but the King of the universe will raise us up to an everlasting renewal of life, because we have died for his laws.”
And when he was near death, he said, “One cannot but choose to die at the hands of men and to cherish the hope that God gives of being raised again by him.” (2 Maccabees 7:9,14)

The Gospel, on the other hand, presents a group of people rarely mentioned in the Gospels – Sadducees. They consider death as only annihilation… nothing to look forward to after that. For the Sadducees, life on earth was real. Anything beyond the grave was… well, imaginary fiction. They pose a question, a riddle, to Jesus about seven brothers marrying the same woman. Although they prefaced their question as a serious search as to how to interpret Moses, Jesus could see their cynicism and ridicule about resurrection and afterlife. Jesus’ reply is a lovely treatise on God of the living and the angel-like life after our earthly pilgrimage. (Luke 20: 27-38)

Birth and death are two points in every human life. Between these two points, we are invited to design our life. Most of us are not privileged to know when and how we shall die. Some are. Some have had close contacts with death. I am thinking of two persons – a priest and a nun. The Priest, a Jesuit, was flying from Italy to Canada. While on air, he had a heart attack. The plane made an emergency, unscheduled stop and he was taken to the hospital. The doctors there told him later that if he had delayed ten minutes, it could have been fatal. The priest told us, after his recovery, that he had a special feeling when he understood that he had shaken hands with death and was still alive. Life looked very different to him from then on. Now, he is serving the Church as a Cardinal.
A nun (Congregation of the Immaculate Conception) had a fatal car accident and sustained head and shoulder injuries. The police who arrived at the scene did not give much chance for the nun to survive. She not only survived, but she is very busy with her mission in educating girls from villages. Such close encounters with death are a privilege given only to a select few.

Some have been given their appointment with death as in the case of those diagnosed with cancer. Most of us may know Greg Anderson who has defied all medical predictions. In 1984, Greg was given hardly 30 days of life, when he was diagnosed with lung cancer. Now, it is 35 years and Greg is going around the world trying to tell people how they can live with cancer and conquer cancer. He is the founder of the Cancer Recovery Foundation International. He has written many books on the theme of living with or conquering cancer. One of them - “The 22 Non-negotiable Laws of Wellness” was published in 1995. Although these laws were primarily meant for people living with cancer, it gives us tips to all of us as to how we can all lead a fruitful life.
Here are a few of these 22 Laws of Wellness:
The Law of Esprit - living life with joy.
The single overriding objective in wellness is creating constant personal renewal where we recognize and act on the truth that each day is a miraculous gift and our job is to untie the ribbons.
The Law of Minimal Medical Invasiveness
Least invasive—that’s the seminal issue. How can my health be enhanced with the least physically invasive, the least chemically toxic, the least psychologically violent approach?
The Law of Developmental Motivation
The essence of the law is this: I am complete but not finished. One of the cancer patients, after attending the course by Greg Anderson, wrote in her course evaluation, “The most important thing I learned was to stop dying of cancer and start living with cancer. I’ve resolved to master death by living life.”
Greg Anderson spells out 22 laws of positive re-enforcement. The last three Laws of this series are:
20. The Law of Gratitude 21. The Law of Personal Peace and 22. The Law of Unconditional Love

In this book he discusses the strained relationship he had with his Dad and how this was eating him up along with his sickness. Once he was willing to forgive his Dad and begin loving him unconditionally, there was a remarkable improvement in his health. Here are the closing lines of the book:
The Law of Unconditional Loving is wellness in the most inclusive sense. All the other laws connect through this greatest of laws...Loving without condition precludes us from ever blaming again. Blaming serves no purpose… Above all, the Law of Unconditional Loving demands that we practice loving. We must do so daily, hourly, minute by minute. In walking that path, we find the great joy of the ultimate call and reap the greatest rewards of wellness.

Like Greg Anderson, Randy Pausch, a computer science professor was diagnosed with terminal cancer. On September 18, 2007, he stepped in front of an audience of 400 people at Carnegie Mellon University (in Pittsburgh, Pennsylvania, USA) to deliver “The Last Lecture” titled “Really Achieving Your Childhood Dreams.” A lot of professors give talks titled “The Last Lecture.” Professors are asked to consider their demise and to ruminate on what matters most to them. And while they speak, audiences can’t help but mull the same question: What wisdom would we impart to the world if we knew it was our last chance? If we had to vanish tomorrow, what would we want as our legacy?

When Randy Pausch was asked to give such a lecture, he didn’t have to imagine it as his last, since he had recently been diagnosed with terminal cancer. With slides of his CT scans beaming out to the audience, Randy told his audience about the cancer that was devouring his pancreas and that would claim his life in a matter of months.
The lecture he gave—“Really Achieving Your Childhood Dreams”—wasn’t about dying. It was about the importance of overcoming obstacles, of enabling the dreams of others, of seizing every moment. It was a summation of everything Randy had come to believe. It was about living.

Randy’s lecture has become a phenomenon, as has the book “The Last Lecture” he wrote based on the same principles, celebrating the dreams we all strive to make realities. Sadly, Randy lost his battle to pancreatic cancer on July 25th, 2008, but his legacy will continue to inspire us all, for generations to come. YouTube says that more than 19.6 million have seen the “The Last Lecture”. Even after quite a few years of its life in YouTube, it still receives around 5000 hits per day.

Like Greg Anderson and Randy Pausch, Gitanjali Ghei, a 16 year old girl from Meerut, India, who died of cancer, have inspired people very much through her poems. Let me close with one of the poems written by Gitanjali. This poem is titled ‘DEAR GOD’:
Dear God: Please hear my prayer
Give me the strength to accept your will
And forgive me for my sins if any.
If you think it fit to take me
Then please give strength and courage
To those who love me
And help me not to rail in self-pity asking why?
But to have faith and to know that
Your will is best.
Help me! Oh, please help me
To trust you not from fear but
Because of Love and Faith

Christ has promised in today’s Gospel that in afterlife we shall all be like angels. Why wait till then? We can meet angels already in this life – angels like Greg Anderson, Randy Pausch and Gitanjali Ghei and become one ourselves.

Randy Pausch – The Last Lecture

Gitanjali Ghei

பொதுக்காலம் - 32ம் ஞாயிறு

மருத்துவமனையில், மரணத்தோடு போராடிக்கொண்டிருந்த ஒரு நோயாளியை, டாக்டர் ஒருவர் சந்தித்தார். அவர் அங்கிருந்து கிளம்பும் வேளையில், நோயாளி அவரிடம், "டாக்டர், சாவதற்கு எனக்குப் பயமாக உள்ளது. சாவுக்குப் பிறகு என்ன இருக்கிறது, சொல்லுங்களேன்" என்று கேட்டார். டாக்டர் அவரிடம், "எனக்குத் தெரியாது" என்று சொல்லியபடி, அந்த அறையின் கதவருகே சென்றார். நோயாளி அவரிடம், "நீங்கள் ஒரு கிறிஸ்தவர். சாவுக்குப் பிறகு என்ன உள்ளதென்று உங்களுக்குத் தெரியாதா?" என்று கேட்டார்.
கதவருகே சென்ற டாக்டர், அதன் கைப்பிடியைத் தொட்டதும், கதவுக்கு மறுபக்கம் நாய் ஒன்று, கதவின் மேல் தன் கால்களால் சுரண்டிக்கொண்டிருந்த சப்தம் கேட்டது. டாக்டர் கதவைத் திறந்ததும், அவரது நாய் பாய்ந்துவந்து, மகிழ்வுடன் அவரது கால்களைச் சுற்றிச் சுற்றி வந்தது.
டாக்டர் நோயாளியைப் பார்த்து, ஓர் அழகான கருத்தைக் கூறினார்: "என்னுடைய நாயைப் பார்த்தீர்களா? அது இந்த அறைக்குள் இதுவரை வந்ததேயில்லை. இந்த அறைக்குள் என்ன இருக்கும் என்பதும் அதற்குத் தெரியாது. அதற்குத் தெரிந்ததெல்லாம் ஒன்றுதான். இந்த அறைக்குள் அதனுடையத் தலைவனாகிய நான் இருப்பது மட்டுமே அதற்குத் தெரியும். எனவே, கதவைத் திறந்ததும், எந்தத் தயக்கமும் இல்லாமல், அது அறைக்குள் பாய்ந்து வந்தது. அதேபோல், சாவுக்கு மறுபக்கம் என்ன இருக்கிறது என்று எனக்குச் சுத்தமாகத் தெரியாது. ஆனால், சாவுக்கு மறுபக்கத்தில் என் தலைவனாம் இறைவன் இருக்கிறார் என்பது மட்டும் எனக்குத் தெரியும். அது போதும் எனக்கு" என்று சொல்லிவிட்டு, டாக்டர், தன் நாயை அழைத்துக்கொண்டு சென்றார்.

மரணத்தைப் பற்றி சொல்லப்படும் பல கதைகளில், கருத்தாழம் மிக்க ஒரு கதை இது. மரணத்தையும் மறுவாழ்வையும் பற்றி அடிக்கடி சிந்திக்க, தாய் திருஅவை நமக்கு வழங்கியிருக்கும் ஒரு காலம், இந்த நவம்பர் மாதம். கல்லறைகளுக்குச் செல்லுதல், இறந்தோருக்காகத் திருப்பலிகள் நிறைவேற்றுதல் என்று, பொருள்நிறைந்த செயல்கள் பலவற்றில் நாம் ஈடுபடுகிறோம். அத்துடன், தற்போது, நாம் வழிபாட்டு ஆண்டின் இறுதியை நெருங்கியுள்ளோம் என்பதால், இன்று நமக்குத் தரப்பட்டுள்ள ஞாயிறு வாசகங்கள், மரணம், மறுவாழ்வு ஆகியவற்றைச் சிந்திக்க நல்லதொரு வாய்ப்பை வழங்குகின்றன.

நம்பிக்கையும் துணிவும் நிறைந்த ஒரு தாயும், அவரது ஏழு மகன்களும் மரணத்தைச் சந்திக்கும் நிகழ்வைக்கூறும் - மக்கபேயர் 2ம் நூல் 7: 1-2, 9-14 - இன்றைய முதல் வாசகம், நமக்குச் சில பாடங்களைச் சொல்லித்தருகிறது. துன்பம், மரணம், ஆகியவை, இறைவனுக்கு முன் சக்தியற்றவை என்று கூறும் இக்குடும்பத்தினர், மோசே தந்த சட்டங்களை மீறுவதற்குப்பதில், சாவைச் சந்திக்கத் துணிகின்றனர். மரணத்தின் மறுபக்கம், தங்களை உயிர்த்தெழச் செய்யும் இறைவனை தாங்கள் சந்திக்கப் போவதாக அவர்கள் அறிக்கையிடுகின்றனர்:
மக்கபேயர் 2ம் நூல் 7: 9,14
"நாங்கள் இறந்தபின் என்றென்றும் வாழுமாறு அனைத்துலக அரசர் எங்களை உயிர்த்தெழச் செய்வார்... கடவுள் மீண்டும் உயிர்த்தெழச் செய்வார் என்னும் நம்பிக்கை எனக்கு இருப்பதால், மனிதர் கையால் இறக்க விரும்புகிறேன்." என்று, இவர்கள் கூறும் சொற்கள், உயிர்ப்பைப் பற்றிய உன்னத அறிக்கைகளாக ஒலிக்கின்றன.

உயிர்ப்பைப் பற்றிய மாற்றுக் கருத்துக்கள் கொண்ட சதுசேயர்களை, இன்றைய நற்செய்தியில் நாம் சந்திக்கின்றோம். இவர்களை, உயிர்த்தெழுதலை மறுக்கும் சில சதுசேயர்கள்' என்று, நற்செய்தியாளர் லூக்கா, நமக்கு அறிமுகம் செய்துவைக்கிறார். மறு உலக வாழ்வைப்பற்றி மக்களுக்கு வலியுறுத்திக் கூறிவந்த இயேசுவை, மக்கள் முன்னிலையில் அவமானப்படுத்தும் எண்ணத்துடன், அவரிடம் ஒரு புதிரான கேள்வியை எழுப்புகின்றனர், சதுசேயர்கள். மறுஉலக வாழ்வையும், திருமணத்தையும் இணைத்து அவர்கள் கேட்ட அந்தக் கேள்வியில் ஒலித்த ஏளனத்தை இயேசு புரிந்துகொண்டார். எனவே, அவர்கள் தொடுத்த கேள்விக்கு நேரடியாகப் பதில் சொல்லாமல், மறுவாழ்வைக் குறித்தும், அந்த வாழ்வில் நாம் சந்திக்கவிருக்கும் இறைவனைக் குறித்தும் அழகான விளக்கங்களைத் தந்தார்.  
"வருங்கால வாழ்வைப் பெறத் தகுதி பெற்ற யாரும் இறந்து உயிர்த்தெழும்போது திருமணம் செய்து கொள்வதில்லை. அவர்கள் வானதூதரைப்போல் இருப்பார்கள். உயிர்த்தெழுந்த மக்களாய் இருப்பதால் அவர்கள் கடவுளின் மக்களே. அவர் இறந்தோரின் கடவுள் அல்ல; மாறாக, வாழ்வோரின் கடவுள். ஏனெனில் அவரைப் பொறுத்தமட்டில் அனைவரும் உயிருள்ளவர்களே" (லூக்கா நற்செய்தி 20: 34-38) என்று இயேசு தெளிவுபடுத்தினார்.

உலகில் பிறக்கும் ஒவ்வொரு மனிதருக்கும் (எல்லா உயிரினங்களுக்கும்), பிறப்பு, இறப்பு என்ற இரு புள்ளிகள் உண்டு. இவ்விரு புள்ளிகளையும் இணைத்து நாம் வரையும் கோலம், நமது வாழ்வு. பல நேரங்களில் நாம் வரையும் கோலம் அலங்கோலமாய் மாறினாலும், அதை அழித்துத் திருத்தி, மீண்டும், மீண்டும், அழகானக் கோலம் வரைய, நமக்கு அழைப்பு வந்த வண்ணம் உள்ளது.
இவ்விரு புள்ளிகளில், பிறப்பு என்ற புள்ளி, எல்லாருக்கும் தெளிவாகத் தெரியும். இறப்பு என்ற புள்ளி, எங்கோ ஓரிடத்தில் இருக்கிறதென்பதும் எல்லாருக்கும் தெரியும். அனைவரும் இறப்போம் என்பது நிச்சயம். ஆனால், எப்போது, எங்கே, எப்படி, இறப்போம் என்பது, நமக்குத் தெரியாது. குணமாக்க இயலாத நோய் கண்ட ஒரு சிலருக்கு, அவர்களது மரணத்திற்கு நாள் குறிக்கப்படுகிறது.
புற்றுநோய் போன்ற உயிர் கொல்லி நோய், பலருக்கு, மறுஉலக வாழ்வைத் தருவதற்கு முன், இவ்வுலகிலேயே மாறியதொரு, புதியதொரு வாழ்வைத் தந்துள்ளது. இப்புதிய வாழ்வினால், ஒரு சிலர், அற்புத குணங்களும் பெற்றுள்ளனர். ஒரு சிலர், குணம் பெற முடியவில்லையெனினும், மரணத்தைச் சந்திக்கும் முன், தங்களையும், தங்களைச் சுற்றி உள்ளவர்களையும், வெகுவாக மாற்றியுள்ளனர்.

1984ம் ஆண்டு, கிரெக் ஆண்டர்சன் (Greg Anderson) என்பவருக்கு, நுரையீரலில் புற்றுநோய் இருப்பதாகக் கண்டுபிடிக்கப்பட்டது. அவர் இன்னும் முப்பது நாட்களே வாழமுடியும் என்று மருத்துவர்கள் கூறினர். அவர்கள் சொன்ன அந்த முப்பது நாட்கள் முடிந்தன. இன்று 35 ஆண்டுகள் கடந்துவிட்டன. ஆண்டர்சன் அவர்கள், இன்று, உலகெங்கும் சென்று, புற்றுநோயுடன் எப்படி வாழமுடியும், புற்றுநோயை எப்படி வெல்லமுடியும் என்பதை, உரைகளாகவும், நூல்களாகவும் வழங்கி வருகிறார்.

புற்றுநோயை மையப்படுத்தி, ஆண்டர்சன் அவர்கள் எழுதிய பல நூல்களில், 1995ல் வெளியிடப்பட்ட நூலின் தலைப்பு: நலமான வாழ்வடைய, சிறிதும் சமரசம் செய்யாமல் கடைபிடிக்க வேண்டிய 22 விதிமுறைகள் (The 22 Non-Negotiable Laws of Wellness). புற்று நோய் உள்ளவர்களுக்கென எழுதப்பட்ட இந்த விதி முறைகள், நம் எல்லாருக்கும் தேவையான பாடங்களை வழங்குகின்றன. அவர் வழங்கிய விதிமுறைகளில் ஒரு சில இதோ:
·          வாழ்வை உற்சாகமாகச் சந்திக்க வேண்டும் என்று ஆரம்பமாகிறது, முதல் விதிமுறை.
·          தேவையின்றி உடலைப் புண்படுத்தாதே என்பது மற்றுமொரு முக்கிய விதிமுறை. மருத்துவம் வெகுவாக வளர்ந்துள்ள இந்தக் காலத்தில், எதற்கெடுத்தாலும் அறுவை சிகிச்சையை நாடுவதற்கு எதிரான விதிமுறை இது.
·          உன்னிடம் உள்ளவற்றை வளர்ப்பது உன் கடமை என்பது மற்றொரு விதிமுறை. இதே எண்ணத்தை, அமெரிக்க எழுத்தாளரும், போதகருமான Henry Van Dyke அவர்கள், வேறு வகையில் கூறியுள்ளார்: "நல்ல குரலுடையப் பறவைகள் மட்டுமே பாடவேண்டும் என்ற நியதி இருந்தால், காடெல்லாம் மயான அமைதி பெற்றுவிடும்."
·          பிறருக்கு ஆற்றும் சேவை வழியே, வாழ்வின் குறிக்கோளை அடைய வேண்டும் என்று ஆண்டர்சன் அவர்கள் கூறும் விதிமுறையை, புகழ்பெற்ற அறிவியலாளர் Albert Einstein அவர்கள், பின்வருமாறு கூறினார்: "சமுதாயத்தில், வெற்றி பெறும் மனிதராவதை விட, சமுதாயத்திற்குப் பயன்படும் மனிதராவதற்கு முயற்சி செய்யுங்கள்."
இவ்விதம் 21 விதிமுறைகளைக் கூறியுள்ள ஆண்டர்சன் அவர்கள், இவையனைத்திற்கும் சிகரமாக, 22வது விதிமுறையைத் தந்துள்ளார். "நிபந்தனையின்றி மன்னிக்கும் மனதை வளர்த்துக் கொள்" என்பது, அவர் தந்துள்ள விதிமுறைகளின் சிகரம்.
இந்தச் சிகரத்தை அடைவது மிகவும் சிரமமென்பதைக் கூற, தன் வாழ்க்கையை, எடுத்துக்காட்டாகக் கூறியுள்ளார். அவரது மரணத்திற்கு மருத்துவர்கள் நாள் குறித்ததும், அவர் மேற்கொண்ட முதல் முயற்சி, பிறரை மன்னிக்கும் முயற்சி. தன் மனதில் மன்னிக்க முடியாமல் பூட்டி வைத்திருந்தவர்களை விடுவிக்க முயன்று, பல முறை தோற்றார் ஆண்டர்சன். வாழ்வில், தான், மிக அதிகமாக வெறுத்தது, தன் தந்தை என்றும், அவரை மன்னித்ததிலிருந்து ஆரம்பமான மன்னிப்பு முயற்சிகளால், விரைவில், தன் உடல்நலனில் முன்னேற்றம் ஏற்பட்டதென்றும் அவர் கூறியுள்ளார்.

ஆண்டர்சன் அவர்களைப் போலவே மரணத்திற்கு நாள் குறிக்கப்பட்ட மற்றொருவர், இராண்டி பவுஷ் (Randy Pausch) என்ற பேராசிரியர். கணணித்துறையில் வல்லுனராக விளங்கிய இவருக்கு, மனைவி, மூன்று குழந்தைகள் என்று அழகான குடும்பம் உண்டு. 2007ம் ஆண்டு, இவரது கணையத்தைக் கரைத்துக்கொண்டிருந்த புற்றுநோய் கண்டுபிடிக்கப்பட்டது. அவ்வாண்டு, அவர் பேராசிரியராகப் பணிசெய்த பல்கலைக் கழகத்தில், அவர் அளித்த "இறுதிச் சொற்பொழிவு" (The Last Lecture), புகழ்பெற்ற ஒரு சொற்பொழிவாகக் கருதப்படுகிறது. YouTubeல் பதிவாகியுள்ள இந்தச் சொற்பொழிவை, ஆயிரக்கணக்கானோர் இன்றும் பார்த்துவருகின்றனர். உங்களது நேரத்தை ஒதுக்கி, இந்த உரையைக் கேளுங்கள். வாழ்வைப் பற்றிய பலத் தெளிவுகள் உங்களுக்குக் கிடைக்கும்.

இராண்டி பவுஷ் அவர்கள், புற்றுநோயோடு மேற்கொண்ட போராட்டம், 2008ம் ஆண்டு ஜூலை மாதம், அவரது 48வது வயதில் முடிந்தது. அவர் வழங்கிய "இறுதிச் சொற்பொழிவு", ஒரு நூலாக, இப்போது, பலரது வாழ்வில் தாக்கங்களை உண்டாக்கிவருகிறது. அவரது மரணத்திற்கு முன், தன் மனைவிக்கும், மூன்று குழந்தைகளுக்கும் 'இன்னும் சிறந்த வாழ்வுக்கு வழிகாட்டி' ("guide to a better life") என்ற தலைப்பில், அவர் எழுதி வைத்த விதிமுறைகளில் ஒரு சில இதோ:
·          மற்றவர் வாழ்வோடு உன் வாழ்வை ஒப்பிடாதே. அவர்கள் மேற்கொண்ட பயணம் என்னவென்று உனக்குத் தெரியாது.
·          உனக்குத் தேவையான எல்லாமே உன்னிடம் உள்ளன. எனவே, பொறாமையால் புழுங்குவது வீண்.
·          உன் மகிழ்வுக்கு நீ மட்டுமே பொறுப்பு. வேறு யாருமல்ல.
·          ஒவ்வொரு நாளும் மற்றவர்களுக்கு நல்லது எதையாவது செய்.
·          கடவுளை நீ அறிந்தால், உன் மகிழ்வுக்கு முடிவிருக்காது.

கிரெக் ஆண்டர்சன், இராண்டி பவுஷ், என்ற இவ்விருவரைப் போலவே, மரணத்திற்கு நாள் குறிக்கப்பட்ட இந்திய இளம்பெண், கீதாஞ்சலி கெய் (Gitanjali Ghei) அவர்கள், 16 வயதிலேயே புற்றுநோய்க்குப் பலியாகி, இவ்வுலகை விட்டுச்சென்றாலும், தன் கவிதைகள் வழியே, இன்றும் வாழ்ந்து வருகிறார். அவர் எழுதிவைத்த கவிதைகள், அவரது மரணத்திற்குப் பின் கண்டுபிடிக்கப்பட்டன. அவை அனைத்தும், நம்பிக்கை தரும் அற்புதச் செய்திகள். அந்தக் கவிதைத் தொகுப்பில் ஒன்று, "அன்பு இறைவா" என்ற தலைப்பில் எழுதப்பட்டுள்ளது. ஒரு செபமாக எழுதப்பட்டுள்ள இக்கவிதை, நம் சிந்தனைகளை இன்று நிறைவு செய்யட்டும்:
அன்பு இறைவா, என் செபத்தைக் கேட்டருளும்.
உமது சித்தத்தை ஏற்றுக்கொள்ள எனக்குச் சக்தி தாரும்.
என் குற்றங்களை மன்னித்தருளும்.
என்னை இவ்வுலகினின்று எடுத்துக்கொள்வது உமக்கு விருப்பமானால்,
என் மீது அன்பு கொண்டவர்களுக்குச் சக்தியையும், மன உறுதியையும் தாரும்.
இது ஏன்? என்ற கேள்வியை எழுப்பி, நான் சுய பரிதாபத்தில் பிதற்றாமல் என்னைக் காத்தருளும்.
உமது விருப்பமே எனக்குச் சிறந்ததென என்னை நம்பச்செய்தருளும்.
உம்மீது கொண்ட பயத்தினால் அல்ல; உம்மீது கொண்ட அன்பினால் உம்மை நம்பும் வரம் அருளும்.
இயேசு இன்றைய நற்செய்தியில் மறுவாழ்வைப் பற்றிக் கூறும்போது, "அவர்கள் வான தூதர்களைப் போல் இருப்பார்கள்" என்றார். மறு வாழ்வை நோக்கி நாம் மேற்கொள்ளும் பயணத்தில், கிரெக் ஆண்டர்சன், இராண்டி பவுஷ், கீதாஞ்சலி கெய் போன்ற பல வானதூதர்களைச் சந்திக்கமுடியும். கண்களையும், செவிகளையும், உள்ளங்களையும் திறந்து, இவ்வுலகப் பயணத்தை மேற்கொள்வோம்.


Wednesday, November 6, 2019

விவிலியத்தேடல்: தீய ஆவி பிடித்தவர் குணமடைதல் – பகுதி 2

Greta Thunberg (right), speaks at the UN Climate Action Summit 2019
(UN Photo)

பூமியில் புதுமை – இளையோர் வரையும் எல்லைக்கோடு

நியூயார் நகரில் அமைந்துள்ள ஐ.நா. தலைமையகத்தில், இவ்வாண்டு, செப்டம்பர் 23ம் தேதி, "காலநிலை நடவடிக்கை உச்சி மாநாடு 2019" (Climate Action Summit 2019) நடைபெற்றது. காலநிலை மாற்றத்தின் ஆபத்துக்களைத் தடுக்க, இளைய தலைமுறையினர் சார்பில் போராடிவரும், 16 வயதுடைய வளர் இளம் பெண், கிரியெத்தா துன்பெரெய் (Greta Thunberg) அவர்கள், இம்மாநாட்டின் காலை அமர்வில், உணர்வுப் பொங்கப் பேசினார்.
அவரது உரைக்கு முன்னதாக, 'உலகத் தலைவர்களுக்கு நீங்கள் கூற விழையும் செய்தி என்ன?' என்று கேட்கப்பட்ட கேள்விக்கு, "உங்களை நாங்கள் உற்றுநோக்கிக் கொண்டிருக்கிறோம் என்பதே என் செய்தி" என்று பதில் கூறியபின், "இப்போது நிகழ்வதனைத்தும் தவறானவை. நான் இங்கே உங்கள் முன் அமர்ந்துகொண்டிருக்கக் கூடாது. நான், என் பள்ளியில் அமர்ந்துகொண்டிருக்க வேண்டும்" என்ற சூடானச் சொற்களுடன், கிரியெத்தா அவர்கள் தன் உரையைத் துவக்கினார். வேதனை, ஆத்திரம், உறுதி என்ற பல உணர்வுகள் வெளிப்படையாகத் தெரிந்த அவர் உரையிலிருந்து ஒரு சில பகுதிகள் இதோ:
"உங்கள் பொருளற்ற சொற்களால், என் கனவுகளையும், குழந்தைப் பருவத்தையும் நீங்கள் திருடிவிட்டீர்கள்... மக்கள் துன்புறுகிறார்கள், இறந்துகொண்டிருக்கிறார்கள். சுற்றுச்சூழல் முழுமையாக அழிந்து வருகிறது. உயிரினங்களின் ஒட்டுமொத்த அழிவு துவங்கிவிட்டது. இந்நிலையில், உங்களுக்கு எவ்வளவு துணிச்சல் இருந்தால், பணத்தைப்பற்றியும், பொருளாதார முன்னேற்றம் என்ற கட்டுக்கதையையும் எங்களிடம் பேசி வருவீர்கள்.
"திருத்தியமைக்க இயலாத சங்கிலித் தொடர் போன்ற எதிர்வினைகளைத் துவக்கும் அளவு, கார்பன்டை ஆக்ஸைடின் வெளியேற்றம் உருவாகியுள்ளது. நீங்கள் வெளியேற்றும் கார்பன்டை ஆக்ஸைடை, என்னுடைய தலைமுறையினர் உள்வாங்கி, துன்பப்படப்போகிறோம்.
"நீங்கள் எங்களைக் காப்பாற்றத் தவறிவிட்டீர்கள். உங்கள் துரோகத்தை இளையோர் புரிந்துகொள்ள ஆரம்பித்துவிட்டனர். தொடர்ந்து நீங்கள் எங்களைக் காக்கத் தவறினால், உங்களை நாங்கள் ஒருபோதும் மன்னிக்கமாட்டோம்.
இதோ, இத்தருணத்தில், இவ்விடத்தில், நாங்கள் உங்கள் எல்லைகளை உணர்த்தும் கோடு ஒன்றை வரைந்துள்ளோம். உலகம் விழித்து எழுகிறது. நீங்கள் விரும்பினாலும், விரும்பாவிட்டாலும், மாற்றம் வந்துகொண்டுதான் இருக்கிறது. நன்றி."

The ancient Synagogue in Capernaum

Severn Cullis-Suzuki - 1992 and Greta Thunberg - 2019
YOUTUBE/REUTERS

தீய ஆவி பிடித்தவர் குணமடைதல் – பகுதி 2

சுற்றுச்சூழலும், பூமிக்கோளமும் அழிவை நோக்கி வெகு வேகமாகச் செல்கிறது என்றும், இதனால், இளையோரின் எதிர்காலம் பறிக்கப்படுகிறது என்றும், கடந்த 15 மாதங்களாக, உலகெங்கும் எச்சரிக்கை விடுத்துவருபவர், கிரியெத்தா துன்பெரெய் (Greta Thunberg). சுவீடன் நாட்டைச் சேர்ந்த, 16 வயதான இளம்பெண் கிரியேத்தா அவர்கள், தன் சந்ததியினர், தற்போது சந்தித்துவரும், மற்றும், சந்திக்கப்போகும் இன்னலைகளைக் குறித்து, பல நாடுகளிலும், பன்னாட்டு அவைகளிலும், துணிவுடன் பேசி வருகிறார்.
27 ஆண்டுகளுக்கு முன், இதே எச்சரிக்கையை, கனடா நாட்டைச் சேர்ந்த செவெர்ன் கல்லிஸ் சுசுகி (Severn Cullis Suzuki) என்ற 13 வயதான இளம் பெண் விடுத்தார். 1992ம் ஆண்டு, ரியோ தெ ஜனெய்ரோ நகரில், ஐ.நா. அவை ஏற்பாடு செய்திருந்த காலநிலை மாற்றம் உலக உச்சி மாநாட்டில், 6 நிமிடங்கள் பேசிய இளம்பெண் சுசுகி அவர்கள், "உங்களால் சரி செய்ய இயலாத இயற்கையை, மேலும் உடைக்காமல் விடுங்கள். அது போதும் எங்கள் தலைமுறையினருக்கு" என்ற அழுத்தந்திருத்தமானதொரு அறிவுரையை உலகத் தலைவர்கள்முன் வைத்தார்.
"உங்கள் பொருளற்ற சொற்களால், என் கனவுகளையும், குழந்தைப் பருவத்தையும் நீங்கள் திருடிவிட்டீர்கள்... உயிரினங்களின் ஒட்டுமொத்த அழிவு துவங்கிவிட்டது. இந்நிலையில், உங்களுக்கு எவ்வளவு துணிச்சல் இருந்தால், பணத்தைப்பற்றியும், பொருளாதார முன்னேற்றம் என்ற கட்டுக்கதையையும் எங்களிடம் பேசி வருவீர்கள்" என்று, இளம்பெண் கிரியேத்தா அவர்கள், ஐ.நா.வின் "காலநிலை நடவடிக்கை உச்சி மாநாட்டில்" தன் முன் அமர்ந்திருந்த உலகத்தலைவர்களின் உள்ளங்களைத் துளைக்கும்வண்ணம் பேசினார்.

தங்கள் வாழ்வில், அனுபவத்தால் உணர்ந்துள்ள உண்மைகளை, தெளிவாக, துணிவாக, உலகத்தலைவர்களிடம் கூறிய இவ்விரு இளம் பெண்களும், இன்றைய உலகின் இறைவாக்கினர்கள் என்று சொன்னால், அது மிகையல்ல. இறைவாக்கினர்களுக்கே உரிய, உண்மையைக் கூறும் துணிவு என்ற பண்பு இவர்களிடம் இருப்பதால், இவர்களது கூற்றுகளில் 'அதிகாரம்' வெளியாகிறது; இவர்களுக்கு செவிமடுக்கும் மக்களில், குறிப்பாக, இளையோரில், நல்ல மாற்றங்கள் உருவாகின்றன. இத்தகைய 'அதிகாரம்' இயேசுவின் கூற்றுகளில் வெளியானதை, மக்கள் உணர்ந்தனர் என்று, சென்ற விவிலியத்தேடலில் சிந்தித்தோம். மறைநூல் அறிஞரைப் போலன்றி, தனிப்பட்ட ஓர் அதிகாரத்துடன் இயேசு அவர்களுக்குக் கற்பித்து வந்தார் - மாற்கு 1: 21-22 - என்று, மாற்கு நற்செய்தியில் வாசிக்கிறோம்.

கடவுளால் அழைக்கப்பட்டு, உருவாக்கப்பட்டு, அனுப்பப்படும் இறைவாக்கினர்களின் இயல்பைப் பற்றி, பழைய ஏற்பாட்டின் இணைச்சட்ட நூல் நமக்கு விளக்குகிறது. இறைவன் சொன்ன செய்திகளைச் சரியாகப் புரிந்துகொண்டு, அவற்றைத் தங்களுக்கு விளக்கி, தங்களை அதுவரை வழிநடத்தி வந்த மோசே என்ற இறைவாக்கினர், இறக்கும் நிலையில் இருந்ததால் கலக்கம் அடைந்திருந்த இஸ்ரயேல் மக்களுக்கு ஆறுதல் சொல்லும்வண்ணம், மோசேயின் சொற்கள் அமைந்திருந்தன:
இணைச்சட்டம் 18: 15-20
மோசே மக்களிடம் கூறியது: ஆண்டவர் என்னைநோக்கி, ‘உன்னைப்போல் ஓர் இறைவாக்கினனை அவர்களுடைய சகோதரர்களினின்று நான் அவர்களுக்காக ஏற்படுத்துவேன். என் வார்த்தைகளை அவனுடைய வாயில் வைப்பேன். நான் கட்டளையிடுவது அனைத்தையும் அவன் அவர்களுக்குச் சொல்வான். என்பெயரால் அவன் சொல்லும் என் வார்த்தைகளுக்குச் செவி கொடாதவனை நான் வேரறுப்பேன். ஆனால், ஓர் இறைவாக்கினன் எனது பெயரால் பேசுவதாக எண்ணிக்கொண்டு, நான் அவனுக்குக் கட்டளையிடாதவற்றைப் பேசினால், அல்லது வேற்றுத் தெய்வங்களின் பெயரால் பேசினால், அந்த இறைவாக்கினன் சாவான்.’”

உன்னைப்போல் ஓர் இறைவாக்கினனை அவர்களுடைய சகோதரர்களினின்று நான் அவர்களுக்காக ஏற்படுத்துவேன் என்று, இறைவன், மோசே வழியாக சொன்னது, கிறிஸ்துவைக் குறித்து சொல்லப்பட்டது என்பது, பல விவிலிய ஆசிரியர்களின் கருத்து. மோசே துவங்கி, இஸ்ரயேல் மக்களுக்கு இறைவாக்கினர்களாக, தலைவர்களாக பலர் இருந்தனர். அவர்களில் பலர், உயர் பதவியில் இருந்து அதிகாரம் செலுத்தவில்லை. உண்மையில் இவர்களில் பலர், பரிதாபமான நிலையில் வாழ்ந்தனர். ஆனாலும், இறைவன் தங்கள் உள்ளத்தில் பதித்த உண்மைகளை, பயமின்றி, மக்களிடம் உரைத்தனர். இறைவனின் பெயரால் பேசுகிறோம் என்ற அந்த அதிகாரம் ஒன்றே, அவர்களைத் துணிவுடன் செயல்பட வைத்தது. இந்த இறைவாக்கினர்களின் முழு வடிவமாக, இறை வாக்காகவே வாழ்ந்த இயேசு, 'அதிகாரம்' என்ற சொல்லுக்கு, இன்னும் பல புதிய இலக்கணங்களைத் தந்தார்.

கப்பர்நாகூம் ஊர், தொழுகைக்கூடத்தில், இயேசு அதிகாரத்துடன் கற்பித்தபோது, சாதாரண மக்கள் அவரது போதனையைக் கேட்டு வியப்பில் ஆழ்ந்தனர் என்று கூறிய நற்செய்தியாளர் மாற்கு, அதே மூச்சில், அங்கிருந்த தீய ஆவி பிடித்த ஒருவருக்கு நேர்ந்ததைப்பற்றி இவ்வாறு குறிப்பிடுகிறார்:
மாற்கு 1: 23-26
அப்போது அவர்களுடைய தொழுகைக்கூடத்தில் தீய ஆவி பிடித்திருந்த ஒருவர் இருந்தார். அவரைப் பிடித்திருந்த ஆவி, "நாசரேத்து இயேசுவே, உமக்கு இங்கு என்ன வேலை? எங்களை ஒழித்துவிடவா வந்தீர்? நீர் யார் என எனக்குத் தெரியும். நீர் கடவுளுக்கு அர்ப்பணமானவர்" என்று கத்தியது. "வாயை மூடு; இவரை விட்டு வெளியோ போ" என்று இயேசு அதனை அதட்டினார். அப்பொழுது அத்தீய ஆவி அம்மனிதருக்கு வலிப்பு உண்டாக்கிப் பெருங்கூச்சலிட்டு அவரை விட்டு வெளியேறிற்று.

தீய ஆவி பிடித்தவர்களை இயேசு குணமாக்கும் புதுமைகள், ஒத்தமை நற்செய்திகளில் மட்டுமே கூறப்பட்டுள்ளன. ஏழு நிகழ்வுகளாகப் பதிவாகியுள்ள இப்புதுமைகளில், இரு தருணங்களில், இயேசுவுக்கும், தீய ஆவி, அல்லது, ஆவிகளுக்கும் இடையே நிகழ்ந்த உரையாடல்கள் இடம் பெற்றுள்ளன. கப்பர்நாகூம் தொழுகைக்கூடத்திலும், கெரசேனர் கல்லறைப் பகுதியிலும் இயேசுவை அடையாளம் கண்டுகொள்ளும் தீய ஆவிகள், அவரிடம் எழுப்பும் முதல் கேள்வி நம் கவனத்தை ஈர்க்கிறது.

"நாசரேத்து இயேசுவே, உமக்கு இங்கு என்ன வேலை? எங்களை ஒழித்துவிடவா வந்தீர்? நீர் யார் என எனக்குத் தெரியும். நீர் கடவுளுக்கு அர்ப்பணமானவர்" என்று கத்தியது. (மாற்கு 1:24, லூக்கா 4:34) என்ற சொற்கள், மாற்கு, லூக்கா ஆகிய இரு நற்செய்திகளிலும் பதிவாகியுள்ளன.
தான் ஆக்கிரமித்துள்ள ஒரு மனிதரிடம் இயேசுவுக்கு எவ்வித அதிகாரமோ, வேலையோ கிடையாது என்பதையும், அம்மனிதர் தன் முழுமையான கட்டுப்பாட்டில் உள்ளார் என்பதையும், தீய ஆவி தெளிவாக்குவதுபோல், உமக்கு இங்கு என்ன வேலை? என்ற கேள்வி அமைந்துள்ளது.

லூக்கா நற்செய்தியில் இந்தக் கூற்றை வாசிக்கும்போது, கூடுதலாக ஓர் எண்ணம் உருவாகிறது. "நாசரேத்து இயேசுவே" என்று, தீய ஆவி குறிப்பிட்டுப் பேசும்போது, இயேசு, கப்பர்நாகும் வருவதற்கு முன், நாசரேத்திலிருந்து துரத்தப்பட்டவர் என்பதை மறைமுகமாகக் குத்திக்காட்டுவதுபோல் தெரிகிறது.
ஒருவர் நன்மை செய்ய விழையும் நேரத்தில், அதை, தடுப்பதற்கும், கெடுப்பதற்கும் திரண்டுவரும் சக்திகள், நன்மை செய்ய முயல்பவரின் பிறப்பிடம், அவர் வாழ்வில் சந்தித்த தோல்விகள் ஆகியவற்றைச் சுட்டிக்காட்டும் முயற்சிகளில் ஈடுபடுவதை நாம் அறிவோம். கப்பர்நாகூம் ஊரில், அத்தகைய முயற்சியில் தீய ஆவி ஈடுபட்டிருந்தது.

கிரியேத்தா மற்றும் சுசுகி என்ற இரு இளம் பெண்கள், இன்றையத் தலைமுறையினரின் சார்பாக, சுற்றுச்சூழலை மையப்படுத்தி போராடிவரும் இறைவாக்கினர்கள் என்ற கோணத்தில் இன்றையத் தேடலை நாம் துவங்கினோம். 1992ம் ஆண்டிலும், 2019ம் ஆண்டிலும், இவ்விரு இளம் பெண்களுக்கும் செவிமடுத்த உலகத் தலைவர்களில் சிலர், குறிப்பாக, சுற்றுச்சூழலுக்கு பெரும் பாதகங்களை விளைவிக்கும் நிறுவனங்களிடமிருந்து பெருமளவு தொகைகளை தங்கள் அரசியல் ஆதாயத்திற்காக பெற்றுள்ள தலைவர்கள், இவ்விரு பெண்களின் குறைகளை வெளிச்சமிட்டுக் காட்டுவதில் குறியாய் உள்ளனர். இவ்விருவரும் வயதில் மிகவும் குறைந்தவர்கள் என்றும், அவர்களுக்கு அனுபவ அறிவோ, அறிவியல் விவரங்களோ போதாது என்றும் கூறி, இவ்விருவரையும் அமைதிப்படுத்த முயன்று வருகின்றனர்.

இவ்விரு இளம் பெண்களும் வெளியிட்டுள்ள அதிர்ச்சி தரும் உண்மைகளை ஏற்றுக்கொள்ள மறுக்கும் மக்கள், சமூக வலைத்தளங்கள் வழியே, தங்கள் எதிர்ப்பை பதிவுசெய்து வருகின்றனர். அறிவியலின் அடிப்படையில், இவ்விருவரும் கூறும் உண்மைகளுக்கு மாற்றுக்கருத்தாக, வேறு தகுதியான உண்மைகளை வெளியிடுவதற்குப் பதில், இவ்விருவரின் பிறப்பு, வளர்ப்பு ஆகியவற்றைத் தாக்கும் வகையில் தங்கள் பதிவுகளை சமூக வலைத்தளங்களில் வெளியிட்டு வருகின்றனர். இவ்விரு பெண்களின் பெற்றோரும், இவர்களை சரிவர வளர்க்கவில்லை, இவர்கள் இருவரும் இடதுசாரி அரசியல்வாதிகளின் கைப்பாவைகள் என்பன போன்ற கருத்துக்களை பதிவுசெய்து வருவது, தீய சக்திகள் பயன்படுத்தும் தந்திரங்களை மீண்டும் நம் நினைவில் பதிக்கின்றது.

தான் வளர்ந்த ஊரான நாசரேத்தில் சந்தித்த எதிர்ப்பை மீண்டும் நினைவுறுத்தும் வகையில், 'நாசரேத்து இயேசுவே' என்று தீய ஆவி குத்திக்காட்டுவதைப் பொருள்படுத்தாமல், அந்தத் தீய ஆவியை விரட்டியடித்தார் இயேசு. அதே வண்ணம், சுற்றுச்சூழலைச் சீரழிக்கும் வர்த்தக சக்திகளுக்கு எதிராக நடைபெறும் போராட்டத்தில், இளையோருக்கு ஓர் உந்துசக்தியாக விளங்கும் கிரியெத்தா துன்பெரெய் (Greta Thunberg) அவர்கள், தனக்கெதிராக எழும் அவதூறுகளுக்குச் செவிமடுக்காமல், தன் சுற்றுச்சூழல் போராட்டத்தை துணிவோடு முன்னின்று நடத்த, இறைவனின் அருளை இறைஞ்சுவோம்.